Stuðningur við stjórnina eykst lítillega

Stuðningur við ríkisstjórnina hefur aukist lítillega á síðustu mánuðum samkvæmt niðurstöðu skoðanakönnunar Fréttablaðsins, en stjórnin mælist enn með stuðning minnihluta kjósenda.

Um 45,5 prósent þeirra sem afstöðu tóku í könnun sem gerð var á fimmtudagskvöld sögðust styðja stjórnina, en hlutfallið var 43 prósent í sambærilegri könnun sem gerð var 28. júlí.

„Þetta er innan skekkjumarka frá síðustu könnun og segir sömu sögu; stjórnin er í erfiðum málum," segir Gunnar Helgi Kristinsson, prófessor í stjórnmálafræði við Háskóla Íslands.

Hann álítur að stuðningur við ríkisstjórn hafi líklega ekki mælst minni í könnunum, en óeðlilegt væri ef vandasöm viðfangsefni og innri sundurþykkja hefðu ekki sín áhrif. „Þetta er ekki of gott en það eru erfiðir tímar," segir hann.

Fleiri konur en karlar styðja ríkisstjórnina. Um 47,8 prósent kvenna sögðust styðja stjórnina, en 43,4 prósent karla. Höfuðborgarbúar eru jákvæðari gagnvart stjórninni en fólk sem býr á landsbyggðinni. Alls sagðist 48,1 prósent íbúa höfuðborgarsvæðisins styðja stjórnina, en 41,8 prósent þeirra sem búa á landsbyggðinni.

Eins og áður er yfirgnæfandi stuðningur við stjórnina meðal stuðningsmanna Samfylkingar og Vinstri grænna, 93 prósent annars vegar og 85 prósent hins vegar. Aðeins 3,7 prósent stuðningsmanna Sjálfstæðisflokks styðja stjórnina, og tólf prósent framsóknarmanna.

Hringt var í 800 manns fimmtudaginn 15. október. Svarendur skiptust jafnt eftir kyni, og hlutfallslega eftir búsetu. Spurt var: Styður þú núverandi ríkisstjórn? Alls tóku tæplega 88 prósent aðspurðra afstöðu til spurningarinnar.- bj, bþs