Björgvin setti Íslandsmet í 300 metra grindarhlaupi

FH-ingurinn Björgvin Víkingsson byrjar tímabilið af miklum krafti en hann bætti í gær Íslandsmetið í 300m grindahlaupi á frjálsíþróttamóti í nágrenni Bern í Sviss.

Björgvin hljóp á 37,68 sekúndum og varð í öðru sæti í hlaupinu en hann bætti þarna met sem Sveinn Þórarinsson FH átti. Sveinn hljóp 300 metrana á 37,81 sekúndum árið 2001.

Björgvin bætti fyrir einu ári síðan Íslandsmetið í 400m grindahlaupi, þegar hann hljóp á 51,17 sekúndum.

Björgvin keppir með landsliði Íslands á Smáþjóðaleikunum á Kýpur í byrjun næsta mánaðar í 400m grindahlaupi og 110m grindahlaupi, auk þess sem hann er í boðhlaupssveitum liðsins.