Púttin að leika Scheffler grátt

Ríkjandi meistari mótsins er jafn í 8. sæti, fjórum höggum undir pari, þegar mótið er hálfnað.

Scheffler skilaði sér í hús á 68 höggum í gær, líkt og í fyrradag, en horfði líka á eftir nokkrum fuglum fljúga frá honum. Alls klikkaði Scheffler á sjö púttum fyrir fuglum, fjögur af þeim voru af minna en þriggja metra færi.

„Ég gerði margt vel. Ég kom mér í mjög góðar stöður. Vildi bara að ég hefði hitt úr fleiri púttum,“ sagði Scheffler í gærkvöld.

Scheffler náði þó að pútta fyrir fugli á 5. holu, sömu holu og spilfélagi hans Bryson DeChambeau fékk tveggja högga víti.

Scheffler er nú fjórum höggum á eftir Lucas Herbert, sem leiðir listann eftir að hafa jafnað vallarmetið á Royal Birkdale vellinum í gær.

„Ég held bara áfram að banka á hurðina, held áfram að koma mér í góðar stöður. Ef ég held áfram að slá svona vel verð ég í fínum málum,“ sagði Scheffler en sá síðasti til að verja Opna breska meistaratitilinn var Padraig Harrington árið 2008.

Opna breska meistaramótið er í beinni útsendingu á Sýn Sport.