Ráðherra sagður tala OR niður

„Það er sérkennilegt þegar ekki má benda á hið augljósa. Það eru erfiðleikar með bæði orkuöflun fyrir álver í Helguvík og fjármögnun Hverahlíðarvirkjunar,“ segir Svandís Svavarsdóttir umhverfisráðherra.

Svandís var harðlega gagnrýnd um helgina vegna viðtals við hana í Fréttablaðinu á laugardag. Þar sagði hún Orkuveituna ekki standa undir skuldsetningu vegna virkjanaframkvæmda í Hverahlíð. Því verði að fara varlega.

Haft er eftir Guðlaugi G. Sverrissynin, stjórnarformanni Orkuveitu Reykjavíkur, í yfirlýsingu um helgina að Svandís hafi ítrekað gert tilraun til að bregða fæti fyrir verkefni sem tiltekin séu í stöðugleikasáttmála stjórnvalda og aðila vinnumarkaðarins. Orkuveitan vinni að fimmta áfanga Hellisheiðarvirkjunar, líklega einni mannaflsfrekustu framkvæmd sem standi yfir á landinu. Hún sé ekki fjármögnuð að fullu en vilyrði sé fyrir langtímafjármögnun frá Evrópska fjárfestingarbankanum sem nái einnig til helming Hverahlíðarvirkjunar. „Það er ótækt að búa við það að fulltrúi ríkisstjórnarinnar leitist við að draga úr fjárhagslegum trúverðugleika þessa fyrirtækis,“ segir í yfirlýsingunni.

Svandís segir viðbrögðin býsna öflug. Vissulega þurfi að tala um málið áður en lengra sé haldið. „Mér finnast viðbrögðin bera keim af pólitískum leiðangri,“ segir Svandís. - jab