Kallar forystu sjálfstæðismanna og Steingrím umskiptinga

„Umskiptingar eru gjarnan á ferðinni á stjórnmálasviðinu. Sjaldan hefur það verið jafn bersýnilegt og eftir þingkosningarnar í vor," segir Kristinn H. Gunnarsson, fyrrverandi þingmaður, í pistli á heimasíðu sinni. Þar beinir hann spjótum sínum að forystumönnum Sjálfstæðisflokksins og formanni Vinstri grænna.

Kristinn segir að Steingrímur J. Sigfússon, formaður VG, segi eitt í stjórnarandstöðu og annað í stjórn. Það sama eigi við Bjarna Benediktsson, formann Sjálfstæðisflokksins, og Þorgerði Katrínu Gunnarsdóttur, varaformann flokksins. Þau hafi aðra skoðun í stjórnarandstöðu en þau töluðu fyrir sem stjórnarliðar.

„Forystumaður Vinstri grænna var einarðastur og stóryrtastur allra gegn Icesave og Alþjóðagjaldeyrissjóðnum," segir Kristinn um Steingrím sem sé nú öllum öðrum einarðari og staðfastari málsvari þess að ljúka samningum um Icesave og fylgja efnahagsáætlun ríkisstjórnar Geirs Haarde og Alþjóðagjaldeyrissjóðsins.

Þá segir Kristinn að forysta Sjálfstæðisflokksins hafi leitt ríkisstjórn og Alþingi til þeirrar niðurstöðu að semja um greiðslu á Icesave innistæðunum. Sama forysta hafi samið við Alþjóðagjaldeyrissjóðinn um efnahagsáætlun og lánsfé. „Það var fyrir kosningar. Eftir kosningar vill forysta sama flokks ekki borga Icesave og vill ekki samstarf við Alþjóðagjaldeyrissjóðinn. Efnahagsáætlunin er nú ómöguleg og engin þörf á lánsfénu," segir Kristinn.

Kristinn telur þetta háttalag ekki vera til þess að auka álit almennings á stjórnmálamönnum. Hann segir að Steingrímur hafi það sér til málsbóta að hann sé að gera það sem þurfi að gera. „Hin hafa það ekki, þau víkja frá því sem þau vita að þarf að gera. Þau falla í þá freistni að gera ríkisstjórninni frekar óleik en að vinna að þjóðarhag. Stjórnmálin þurfa að breytast og leikrit umskiptinganna er eitt af því sem má hverfa."