Listamenn streyma í vinnu á Skagaströnd

„Þetta fólk kann óskaplega vel við sig og hefur sýnt af sér gríðarlega indæla og góða framkomu,“ segir Sigurður Sigurðar­son, formaður stjórnar Nes listamiðstöðvar á Skagaströnd, um erlenda listamenn sem flykkst hafa til dvalar í lista­miðstöðinni.

Sigurður segir að frá því Nes listamiðstöð hóf að taka við erlendum listamönnum fyrir um einu og hálfu ári hafi um 160 listamenn frá öllum heimshornum dvalið á vegum miðstöðvarinnar á Skagaströnd. Fjöldinn vaxi stöðugt.

„Þetta hefur ekki farið hátt en er alveg stórmerkilegt apparat á landsvísu og hefur komið Nes listamiðstöð og Skagaströnd á kortið,“ segir Sigurður, sem kveður listamiðastöðina vera mikla lyftistöng fyrir lítið bæjar­félag. „Það skiptir miklu máli þegar bætist svona margt fólk í lítið samfélag og það nýtir sér alla þjónustu hér innanbæjar.“

Að sögn Sigurðar leigir Nes listamiðstöð íbúðir af sveitar­félaginu fyrir listamennina sem búi síðan saman nokkrir í íbúð. Vinnuaðstöðu hafi þeir í gömlu frystihúsi sem hafi verið breytt og lagfært. Sigurður segir listamiðstöðina auglýsta sem slíka út um allan heim. Það hafi skilað sér auk þess sem orðsporið hafi spurst út.

„Þarna eru góðir listamenn inn á milli og aðrir sem eru kannski að byrja. Það er virkilega gaman að þessu fólki og þetta hefur sett mikinn svip á samfélagið hérna,“ segir Sigurður og bætir því við að hinir erlendu gestir kunni afar vel við sig á Skagaströnd. Flestir séu í einn mánuð en sumir hafa jafnvel verið fimm mánuði í bænum. „Þeir njóta tilverunnar hér. Sumir hafa eignast hér mjög góða vini og halda sambandi við okkur þó að þeir sér farnir í burtu. Sumir koma meira að segja aftur.“

Fjórtán manna hópur sem kom til dvalar á Skagaströnd í október hittist á sameiginlegum fundi í gær. Þar eru á ferðinni allra handa listamenn; málarar, rithöfundar og ljósmyndarar. Fólkið kemur víðs vegar að; frá Ástralíu, Brasilíu, Bandaríkjunum, Frakklandi, Írlandi og Englandi. gar@frettabladid.is