Misjafnt gengi Íslendinganna í Englandi

Emil Hallfreðsson var í sigurliði Barnsley gegn Doncaster í ensku B-deildinni í dag en annars gekk Íslendingaliðunum ekkert sérstaklega vel á Englandi í dag.

Grétar Rafn Steinsson sat allan tímann á bekknum er Bolton tapaði fyrir Manchester United í dag, 2-1. Þá er Hermann Hreiðarsson meiddur en hans menn í Portsmouth töpuðu fyrir Tottenham á heimavelli í dag, 2-1.

Watford vann að vísu sinn leik í ensku B-deildinni, 1-0 gegn Middlesbrough á útivelli. Heiðar Helguson er hins vegar fjarverandi vegna meiðsla.

Aron Einar Gunnarsson var í byrjunarliði Coventry sem tapaði fyrir Sheffield Wednesday á útivelli, 2-0. Aron var tekinn af velli á 58. mínútu.

Barnsley vann 1-0 sigur á Doncaster en Emil var skipt út af á 57. mínútu leiksins.

Ívar Ingimarsson lék allan leikinn fyrir Reading sem tapaði fyrir West Brom á útivelli, 3-1. Gylfi Sigurðsson var á bekknum en Brynjar Björn Gunnarsson ekki í hópnum.

Þá kom Ármann Smári Björnsson inn á sem varamaður á 70. mínútu er Hartlepool vann 2-0 sigur á Swindon í ensku C-deildinni.