Rær hundrað kílómetra til að safna fyrir röntgentæki

Íþróttafræðinemi hyggst róa hundrað kílómetra til að safna fyrir röntgentæki handa konum sem fara í fleygskurðsaðgerðir vegna brjóstakrabbameins á Landspítalanum. Konum í slíkum aðgerðum er haldið sofandi rúmlega hálftíma lengur en þörf krefur á meðan krabbameinssýnið er sent með leigubíl til greiningar í krabbameinsfélaginu.

Tæplega hundrað og áttatíu konur greinast með brjóstakrabbamein á ári allar þurfa að fara í svokallaða fleygskurðsaðgerð á landspítalanum. En svo hægt sé að sjá hvort nægilegur hluti brjóstsins hafi verið tekinn þarf að senda sýnið úr brjósti konunnar með leigubíl frá landspítalanum til Krabbameinsfélagsins í Skógarhlíð.

Þetta segja læknar mikið óhagræði og beinlínis hættulegt að halda konum sofandi lengur en þörf krefur. Tækið sem til þarf á skurðdeild landspítalans er röntgentæki sem kostar hátt í tuttugu milljónir króna. Nú hefur Hulda Bjarkar íþróttafræðinemi ákveðið að bregðast við þessu og hyggst róa hundrað kílómetra til styrktar kaupum á þessu tæki fyrir samtökin betra brjóst.

Stóri dagurinn er 30.október í Sporthúsinu og þeir sem vilja leggja málefninu lið geta lagt inn þetta reikningsnúmer: 0140-15-380954, kennitala: 440609-1980