Sjúkraflutningamaður hraunar yfir hælisleitanda á Facebook

,,Negla ætti frímerki á rassgatið á þessu liði og senda út með fyrstu vél til Órafarrillíu." Þetta er skoðun sjúkraflutningsmanns á Suðurnesjum um flóttamenn og alsírskan hælisleitanda sem verið hefur í hungurverkfalli í tuttugu daga.

Tuttugu daga hungurverkfall alsírska hælisleitandans Mansris Hachem hefur vakið viðbrögð í bloggheimum. Margir virðast hafa skoðanir á málinu, þar á meðal sjúkraflutninga- og slökkviliðsmaður hjá Brunavörnum Suðurnesja.

Hann ritar á facebook síðu sína við frétt Morgunblaðsins af máli Hachems og annarra hælisleitenda:

,,Hvaða helvítis rugl er þetta !! Held við ættum bara að negla frímerki á rassgatið á þessu liði og út með fyrstu vél til Órafarrillíu."

Þessi maður á 864 vini á facebook. Fimmtán manns gera athugasemdir við skoðun hans og taka í sama streng.

Einn þeirra segir: ,,Nákvæmlega bara kex ruglað pakk og bara burt með þá"

Annar segir: ,,Byssukúla og málið er úr sögunni, senda svo fjölskyldum þessa fólks reikning fyrir kúlunni."

Sá þriðji segir: ,,En að senda þá bara út í Kattholt þeir geta klórað sig út þar "

Og því svarar síðueigandi: ,,Kattholt er full gott fyrir þá, mér skilst að það sé laust pláss í brasilísku fangelsunum, þessum margrómuðu :)"

Þá lýstu slökkviliðsmaður úr slökkviliði höfuðborgarsvæðisins og lögreglumaður á Suðurnesjum yfir velþóknun sinni á umræðunni.

Jón Guðlaugsson slökkviliðsstjóri hjá Brunavörnum Suðurnesja harmar mjög að starfsmenn tjái sig með þessum hætti. Sérstaklega þar sem viðkomandi starfsmaður gæti komist í þá aðstöðu að flytja hælisleitandann á sjúkrahús versni ástand hans enn frekar.