Shakiru-dansinn vekur athygli

„Shakira kveikir hreinlega í dýnunni með heitum dansaralegum náunga og sannar að hún getur enn þá dansað eins og hún gerði í myndbandinu við lagið Whenever, Wherever árið 2001." Þetta skrifar Tanner Stransky, blaðamaður vefútgáfu Entertainment Weekly, á vefsíðu tímaritsins.

Stransky er yfir sig hrifinn af nýjasta myndbandi latínubombunnar Shakiru, en eins og Fréttablaðið greindi frá á þriðjudag samdi Katrín Hall, listrænn stjórnandi Íslenska dansflokksins, umræddan dans. Hann var augljóslega ekki með allar upplýsingar á hreinu þegar hann skrifaði umfjöllunina þar sem hann veltir fyrir sér hver í ósköpunum samdi dansinn. „Spurningin sem brennur á mér er; hver samdi dansinn? Sú sem gerði það gerir svipaða hluti og voru í gangi í Matrix-trílógíunni," skrifaði Stransky. Hann virðist síðan hafa komist í vefútgáfu Fréttablaðsins, þar sem hann uppfærir umfjöllunina og segir að það hafi verið afar áhugaverð ákvörðun að fá Katrínu Hall í verkefnið.