Rökkur lætur á sér kræla

Rökkur Reykjavík er nýtt framleiðslufyrirtæki sem sérhæfir sig í tónlistar- og tískuviðburðum. Markmiðið þess er að skapa betri vettvang fyrir íslenska hönnuði.

Rökkur Reykjavík er nýtt framleiðslufyrirtæki sem mun sérshæfa sig í tísku- og tónlistarviðburðum. Að fyrirtækinu standa fatahönnuðurinn Bóas Kristjánsson og plötusnúðurinn Nuno da Palma, auk þess sem Arna Sigrún Haraldsdóttir, fatahönnuður, og grafíski hönnuðurinn Gunnar Þorvalds koma einnig að verkefninu.

„Hugmyndin varð til á tískuvikunni í París í sumar, þar sem ég var að sýna hönnun mína og Nuno var að spila. Okkur langaði til að skapa sambærilegan vettvang fyrir íslenska tísku og hönnun og ætlum að nota tónlistina sem einskonar aðdráttarafl til að laða fólk að," segir Bóas um tilurð Rökkurs. „Það er kannski hægt að líta á þetta sem hjónaband milli hönnunar og tónlistar," bætir Nuno við. Eitt af markmiðum Rökkurs er að standa að ýsmum tískutengdum viðburðum auk þess sem hugmyndir eru um að koma á laggirnar árlegri tískuviku þar sem tónlist og tísku verður blandað saman og skapa þannig einstakan viðburð sem dregur að fjölda gesta.

Bóas og Nuno segja engan sérhæfðan hönnunarmiðil vera hér á landi og því vanti vettvang fyrir hönnuði til að koma sér á framfæri. „Íslensk tónlist hefur fengið að vaxa og dafna síðastliðin áratug og okkur finnst hönnun eiga einnig að fá tækifæri til að þroskast og vaxa. Hér er mikið af hæfileikaríkum hönnuðum og hugmyndin er að reyna að skapa samstarf þar á milli og byggja upp þennan iðnað með sameiginlegu átaki," segir Bóas.

Aðspurður hvort erfitt sé að laða erlenda aðila hingað til lands segir Nuno svo ekki vera. „Fólk er almennt mjög forvitið um Ísland. Í gegnum tíðina hef ég verið mikið í sambandi við erlenda tónlistamenn og þeir hafa jafnvel verið til í að lækka launakröfur sínar til þess að geta tekið að sér verkefni hér. Þannig það ætti ekki að vera vandamál að lokka fólk hingað."

Sérstakt kynningarteiti verður á skemmtistaðnum Austur þann 12. desember ásamt ljósmyndasýningu sem ber yfirskriftina Fashion Imagery: Native Eye. Þar verða sýnd verk eftir íslenska tískuljósmyndara sem hafa verið að gera það gott á erlendri grundu. -sm