Björgunarsveitir sinntu um 150 útköllum í gær

Björgunarsveitir á Suður- og Vesturlandi sinntu um 150 útköllum í gær vegna veðurofsans. Mikið eignatjón varð í óveðrinu en engan sakaði.

Óveðrið gekk yfir suður og vesturland í gær og náði hámarki skömmu eftir hádegi. Í Vestmannaeyjum og á Kjalarnesi náðu mestu vindhviðurnar 55 metrum á sekúndu.

Eignatjón varð mikið. Þakplötur rifnuðu af húsum og bílar fuku á hliðina. Fjölmargar rúður brotnuðu þegar lausir hlutir lentu á þeim og dæmi um að heilu gámarnir hafi tekist á loft.

Alls sinntu björgunarsveitir á Suður og Vesturlandi um 150 útköllum í gær. Á höfuðborgarsvæðinu voru þau 80 og 30 í Vestmannaeyjum.

Veðrinu slotaði í Vestmannaeyjum seinni partinn og en björgunarsveitir fóru í síðustu útköll á höfuðborgarsvæðinu um klukkan hálf átta í gærkvöldi.

Samkvæmt upplýsingum frá Landsbjörgu var ekki mikið um útköll þegar veðrir gekk norður yfir landið. Björgunarfélag Ísafjarðar var kallað út þegar þakplötur losnuðu af rækjuvinnslunni Kampa og þá var einnig um nokkur útköll að ræða á Húsavík og á Siglufirði vegna foks í bæjunum.