Með íslenskan banka í sigtinu

Rannsóknarteymi bresku efnahagsbrotaskrifstofunnar (Serious Fraud Office, SFO) er með íslenskan banka til skoðunar, og bráðlega verður ljóst hvort formleg rannsókn á mögulegum lögbrotum verður hafin.

Þriggja manna hópur frá SFO hefur skipst á upplýsingum og gögnum um bankana við starfsmenn embættis sérstaks saksóknara frá því á mánudag.

„Með því að deila gögnum höfum við hraðað rannsókn okkar umtalsvert, og ég er viss um að hið sama má segja um embætti sérstaks saksóknara. Við höfum í raun unnið margra vikna verk á þeim þremur dögum sem við höfum eytt hér á landi,“ segir Polly Sprenger, sem fer fyrir hópnum frá SFO.

Sprenger er vongóð um að einhver af þeim atriðum sem nú séu í skoðun og tengjast íslenska bankanum komist á það stig að hægt verði að hefja rannsókn, og í framhaldinu sækja grunaða til saka.

SFO hóf óformlega skoðun á öllum íslensku bönkunum sem höfðu starfsstöðvar í Bretlandi í vor, en þá voru ekki næg sönnunargögn til að hefja formlega rannsókn. Skoðun SFO nú beinist að einum af viðskiptabönkunum þremur, en Sprenger vill ekki upplýsa hvaða hver sá er.- bj