Vann dómsmál vegna læknamistaka

Eyjamaður á sjötugsaldrinum vann skaðabótamál gegn ríkinu vegna ófaglegrar meðferðar eftir að hann fór úr axlalið.

Það var að næturlagi í desember árið 2002 sem maðurinn datt úr sófa og fór úr axlarlið. Hann leitaði aðstoðar á Heilbrigðisstofnun Vestmannaeyja í kjölfarið.

Þá þegar var ljóst að það yrði að taka röntgenmynd af öxlinni en það var ekki mögulegt sökum þess að slíka þjónustu var ekki hægt að fá um nótt í bænum. Úr varð að læknir gaf honum verkjalyf og reyndi að skorða öxlina í lið á ný.

Um átta tímum síðar komst maðurinn loksins í myndatökuna. Þar kom í ljós að hann hafði hlotið taugaskaða í öxlinni. Maðurinn var síðar úrskurðaður 20 prósent öryrki vegna þessa.

Í dómsorði Héraðsdóms Reykjavíkur segir: „Rúmar tíu klukkustundir liðu því stefnandi var fluttur á heilbrigðisstofnunina og þar til handleggur hans var kominn í axlarlið. Allan tímann leið stefnandi miklar kvalir og hlaut í kjölfarið taugaskaða. Verður að taka undir það með stefnanda að starfsmenn Heilbrigðisstofnunar Vestmannaeyja hafi með aðgerðarleysi sínu og ófaglegum vinnubrögðum sýnt af sér stórfellt gáleysi."

Maðurinn fékk dæmdar 1,3 milljónir króna en málskostnaður var greiddur af ríkinu.