Fyrningarleiðin mun gera útgerðarbæi gjaldþrota

Fyrningarleið í sjávarútvegi mun setja atvinnulíf fjölda útgerðarbæja í rekstrarvanda á örfáum árum og gera það gjaldþrota á 7 árum, segir í yfirlýsingu frá meirihluta bæjarstjórnar í Vestmannaeyjum.

„Nú þegar eru íbúar sjávarbyggða farnir að verða varir við skaðleg áhrif þessarar stefnu því útgerðir halda nú að sér höndum í öllum framkvæmdum og þróunarverkefnum. Slíkt er skiljanlegt þegar ríkisstjórn stefnir að því að gera þessar sömu útgerðir gjaldþrota. Þetta bitnar fyrst og fremst á íbúum í sjávarplássum á landsbyggðinni sem með þessu sogast af auknu afli inn í höfuðborgarkreppuna," segir í yfirlýsingunni.

Bæjarfulltrúarnir sem standa að yfirlýsingunni harma viðbrögð þingmanna Samfylkingarinnar við ályktunum sveitarstjórna um fyrningarleiðina. Þeir segja að umræðan um að verið sé að standa vörð um sérhagsmuni séu fjarstæðukennd enda sé hlutverk sveitarstjórnarmanna að gæta að hagsmunum sinna sveitarfélaga. Bæjarfulltrúarnir segja að ekki sé hægt að sitja undir aðdróttunum þingmanna Samfylkingarinnar um annað.