Í sínu þriðja opinbera starfi á árinu

Einar Karl Haraldsson, nýráðinn upplýsingafulltrúi forsætisráðuneytisins, er í sínu þriðja starfi á árinu hjá hinu opinbera. Auk þess að þiggja biðlaun, hefur hann gengið í tvö störf hjá hinu opinbera sem ekki voru auglýst.

Tilkynnt var í vikunni að Einar Karl Haraldsson, hafi verið ráðinn upplýsingafulltrúi í forsætisráðuneyti. Einar Karl er ráðinn til hálfs árs. Staðan var ekki auglýst. Forveri hans, Kristján Kristjánsson hætti, þegar ráðningarsamningur hans rann út. Ekki var heldur auglýst eftir hans kröftum á sínum tíma.

Þetta er ekki fyrsta starfið sem Einar Karl hefur tekið að sér fyrir hið opinbera í ár. Hann var aðstoðarmaður Össurar Skarphéðinssonar, sem var iðnaðarráðherra. Hann fór svo á biðlaun, þegar Össur flutti sig yfir í utanríkisráðuneytið.

Síðan tók hann að sér verkefni fyrir Landspítalann. Ekki var auglýst eftir nokkrum í það starf, svo vitað sé, en þar mun Einar Karl hafa verið verktaki; en féð til spítalans kemur að megninu til úr sameiginlegum sjóðum.

Hann hefur í sumar verið á biðlaununum áfram, en samt sem áður tekið að sér verkefni í forsætisráðuneyti Jóhönnu Sigurðardóttur. Nú hefur hann verið ráðinn þangað.

Hefði er fyrir því og heimild að ráðherrar séu með aðstoðarmann; en þeir hafa oft verið fleiri - yfirleitt ráðnir tímabundið - og verið kallaðir ýmsum nöfnum. Til að mynda var Ólafur Ragnar Grímsson, með þrjá aðstoðarmenn þegar hann var fjármálaráðherra; einn var aðstoðarmaður, annar efnahagsráðgjafi og þriðji upplýsingafulltrúi.