Jarðskjálfti undir Vatnajökli

Jarðskjálfti af stærðinni 4,3 varð undir vestanverðum Vatnajökli upp úr klukkan hálfeitt í nótt. Samkvæmt upplýsingum Veðurstofunnar hafði snörp jarðskjálftahrina hafist um fimmtán mínútum áður á sama stað.

Ekki hefur orðið vart við gosóróa eða annað sem bendir til eldsumbrota, en skjálftarnir urðu norðvestur af Grímsvötnum, um 8 km austnorðaustur af svokölluðum Hamri, sem er vestan við staðinn þar sem Gjálpargosið varð fyrir þrettán árum.

Allt hefur verið með kyrrum kjörum í morgun í jarðskorpunni á þessum slóðum, að sögn Veðurstofu.