Eiginkonan fylgdist með lífsháska mannsins

Eiginkona annars mannsins sem var hætt kominn er hann var um borð í lóðsbátnum Aðunni sem hvolfdi við björgunarstörf í dag, varð vitni af því þegar bátnum hvolfdi. Hún var á landi og fylgdist með björgunaraðgerðunum eins og svo margir þegar Auðunn togaðist með togaranum Sóley-Sigurjóns og hvolfdi í kjölfarið.

Kvikmyndatökumaður Stöðvar 2 náði ótrúlegum myndum af því þegar bátnum hvolfdi og mátti sjá annan manninn á hlið lóðsbátsins þegar honum hvolfdi. Með snarræði tókst honum að halda jafnvægi á bátnum þegar hann fór á hliðina og svo virðist hann hverfa.

Eiginkona annars mannsins þurfti að sitja og fylgjast með háskanum frá landi.

Þegar mennirnir komu í land og ljóst var að hvorugum varð meint af fagnaði hún manni sínum innilega eins og sjá má á myndinni sem Víkurfréttir náðu síðdegis.

Það var bátur Landsbjargar sem flutti mennina í land þar sem þeir fengu aðhlynningu. Sjúkrabílar komu úr Reykjanesbæ og fluttu mennina á Heilbrigðisstofnun Suðurnesja til skoðunar.