Enska úrvalsdeildin: Given varði víti í markalausu jafntefli

Einn leikur fór fram í ensku úrvalsdeildinni í dag þar sem Birmingham og Manchester City skildu jöfn á St. Andrews-leikvanginum í Birmingham.

Manchester City var mun meira með boltann í leiknum en Birmingham fékk kjörið tækifæri til þess að taka forystuna snemma í síðari hálfleik þegar liðið fékk réttilega dæmda vítaspyrnu.

James McFadden fór á punktinn en lét Shay Given verja slaka spyrnu sína.

Leikurinn fjaraði smátt og smátt út eftir það en Barry Ferguson hjá Birmingham fékk rautt spjald í uppbótartíma fyrir að handleika boltann viljandi.

Þrátt fyrir jafnteflið skaust Manchester City upp í fjórða sæti deildarinnar en liðið hefur nú gert fjögur jafntefli í röð í deildinni.