Hughes: Mjög sáttur með byrjun tímabilsins hjá okkur

Knattspyrnustjórinn Mark Hughes hjá Manchester City er ekki af baki dottinn þó svo að liðið hafi aðeins unnið einn leik af síðustu fimm deildarleikjum sínum.

Hughes kveðst afar sáttur með byrjun tímabilsins hjá City en eftir úrslit gærdagsins, þar sem bæði Tottenham og Liverpool töpuðu, getur liðið nú skotist upp í fjórða sæti deildarinnar með sigri gegn Birmingham á St Andrews-leikvanginum.

„Varnarleikur okkar hefur verið undir smásjánni hjá fjölmiðlum undanfarið útaf þeim mörkum sem við höfum fengið á okkur í síðustu leikjum en menn verða að hafa í huga að aðeins Chelsea af sex efstu liðum deildarinnar hefur fengið á sig færri mörk en við. Við erum ennfremur eina lið deildarinnar sem hefur aðeins tapað einum leik.

Menn tala um stöðugleika og er ekki stöðugleiki að tapa aðeins einum af fyrstu níu leikjunum? Við erum því mjög sáttir með byrjun tímabilsins hjá okkur og við vitum að við eigum enn mikið inni," sagði Hughes á blaðamannfundi fyrir leikinn í dag sem hefst kl. 16.