Hughes: Við spiluðum ekki eins vel og við getum

Knattspyrnustjórinn Mark Hughes hjá Manchester City kaus að einblína á jákvæðu punktana eftir enn eitt jafntefli liðs síns í ensku úrvalsdeildinni í kvöld þegar það heimsótti Birmingham á St. Andrews-leikvanginn.

City var langt frá sínu besta í leiknum og getur þakkað markverðinum Shay Given fyrir jafnteflið en hann varði vítaspyrnu snemma í síðari hálfleik en leikurinn endaði með markalausu jafntefli.

„Við spiluðum ekki eins vel og við getum. Við vissum samt að við þyrftum að berjast til þess að fá eitthvað út úr leiknum og það gekk eftir.

Menn tala um fjögur jafntefli í röð en það verður að hafa það í huga að þrír af þessum leikjum voru á útivelli. Við erum því að safna að okkur mikilvægum stigum," sagði Hughes í leikslok í kvöld en City skaust upp í fjórða sæti með jafnteflinu.