Skiptameðferð eðlilegri en yfirtaka á Straumi

Jón Magnússon, þingmaður Sjálfstæðisflokksins, undrast að stjórnvöld hafi tekið yfir fjárfestingabankann Straum Burðarrás í dag. Eðlilegra hefði verið að bankinn hefði farið í skiptameðferð án þess að ríkið blandaði sér í málið. Hann spyr á vefsíðu sinni hvort einhverjar sérstaktar ástæður liggi fyrir ákvörðun ríkisstjórnarinnar að hætta fjármunum almennings með þessum hætti.

Fjármálaeftirlitið beitti neyðarlögunum á Straum Burðarás í dag til að bjarga tugmilljarða innistæðum sem Íbúðalánsjóður og lífeyrissjóðirnir áttu í bankanum og yfirtók rekstur hans. Skilanefnd fer nú með öll málefni Straums.

,,Af hverju var þörf á því að hætta peningum skattborgaranna í þetta ævintýri. Hér var ekki um hefðbundinn viðskiptabanka að ræða og ábyrgð ríkisins því takmörkuð ef nokkur. Af hverju þá að taka ábyrgð á milljarða hundruðum?" segir Jón.