Borgarafundur um atvinnumál í Reykjanesbæ

Sveitarfélög og launþegahreyfingin á Suðurnesjum efna til borgarafundar um atvinnumál í Reykjanesbæ í kvöld klukkan 18:00 en yfirskrift fundarins er „Baráttan um vinnu".

Í tilkynningu frá Reykjanesbæ segir að tilefni fundarins sé að kalla eftir skýrum stuðningi ríkisstjórnarinnar til uppbyggingar þeirra miklu atvinnutækifæra sem geta farið af stað um næstu áramót ef ekki verði frekari tafir.

„Stærstu áformin í atvinnuuppbyggingu, s.s. álver, kísilver og gagnaver, krefjast orku sem þarf að flytja á milli staða. Þeim er teflt í tvísýnu með ákvörðun umhverfisráðherra að tefja enn frekar vinnu við raforkulagnir um Suðurnes. Óljóst er hvort tafir á uppbyggingu vegna ákvörðunar ráðherrans þýða mánuði eða ár. Úr þessu þarf ríkisstjórnin strax að skera.

Þá hefur ríkisstjórnin ekki svarað því hvort og með hvaða hætti hún hyggst styðja hafnargerð í Helguvík sem engu að síður er langt komin. Öllum töfum í atvinnuuppbyggingu er stefnt gegn atvinnulausum og tekjulágu fólki, sem beðið hefur árum saman eftir öruggum og vel launuðum störfum. Yfir 1600 manns eru nú atvinnulausir á Suðurnesjum," segir í tilkynningunni.

Fundurinn verður haldinn í Fjölbrautarskóla Suðurnesja.