Einbúi kærir hestamann fyrir líkamsárás

Tæplega áttræður einbúi úr Eyjafjarðarsveit kærði hestamann fyrir líkamsárás sem hann á að hafa orðið fyrir síðdegis á laugardaginn. Samkvæmt heimildum Vísis var um að ræða ágreining vegna ágangs hesta á land einbúans.

Meintur árásarmaður, sem er um fertugt, á að hafa lyft einbúanum og hrist hann hraustlega til.

Einbúinn fór ásamt öðrum manni til lögreglunnar á Akureyri í morgun og lagði fram formlega kæru vegna málsins.

Samkvæmt sveitungum einbúans sem Vísir ræddi við þá er um langvinna deilu að ræða þeirra á milli. Hestamaðurinn á um 100 hesta sem hann heldur á landi við hlið einbúans. Sjálfur vill einbúinn meina að hestarnir gangi á land hans og hefur hann verið ósáttur við það.

Einbúinn á margítrekað að hafa lýst yfir óánægju sinni vegna málsins, bæði við hestamanninn sem og sveitastjórn Eyjafjarðasveitar. Ágreiningur mannanna náði hámarki á laugardaginn þegar hestamaðurinn á að hafa lagt hendur á bóndann.

Þegar haft var samband við lögregluna var rannsókn ekki hafin.