Réðist á lögregluna í Vestmannaeyjum vopnaður golfkylfu

Lögreglan í Vestmannaeyjum komst í hann krappann síðastliðinn laugardag en þá yfirbugðu lögregluþjónar mann sem réðst á þá vopnaður golfkylfu.

Lögreglan hafði haft afskipti af manninum fyrr um daginn. Þá var hann staddur á veitingastaðnum Volcano. Maðurinn hafði tekið annan viðskiptavin hálstaki. Fórnalamb hans hlaut litla áverka af árásinni. Hann ákvað að kæra ekki manninn og var því árásarmanninum ekið heim til sín.

Skömmu síðar fékk lögreglan hringingu frá heimili árásarmannsins og var óskað eftir aðstoð þar sem maðurinn var með ógnandi tilburði vopnaður hnífi.

Þegar lögreglan mætti á vettvang tók maðurinn á móti þeim vopnaður golfkylfu. Hann gerði sig líklegan til þess að slá lögreglumennina. Hann var þá yfirbugaður og notaði lögreglan meðal annars piparúða til þess.

Maðurinn var síðan færður á lögreglustöðina þar sem hann fékk að sofa úr sér áfengisvímuna.