Listmunasali býður mótmælendum í kaffi

„Þeim verður áreiðanlega bara boðið í kaffi," segir Tryggvi Friðriksson, eigandi Gallerí Foldar vegna fyrirhugaðra mótmæla Samtaka Íslenskra Myndlistarmanna (SÍM) fyrir utan galleríið klukkan sex í kvöld. Mótmælin fara fram á sama tíma og uppboð fer fram í Galleríinu.

Ástæða mótmælanna er sú að SÍM sakar Gallerí Fold um að innheimta fylgiréttargjöld af seldum listaverkum en skila svo ekki gjöldunum áfram til listamannanna sjálfra. SÍM hefur meðal annars stefnt Gallerí Fold fyrir Héraðsdóm Reykjavíkur. Þar krefjast þeir 21 milljón króna vegna meintra vangoldinna fylgigjalda.

„Við höfum átt lengi í deilum við þá vegna fylgiréttargjaldanna," segir Tryggvi en málið er langt því frá að vera nýtt af nálinni. Hann segir SÍM meðal annars hafa kært galleríið fyrir fjársvik en málið var látið niður falla.

Sjálfur er Tryggvi ósáttur við gjöldin og vill meina að SÍM sé að mismuna galleríum, „þeir innheimta gjaldið hjá okkur en ekki öðrum," segir hann.

Spurður hvort mótmælin munu breyta einhverju vegna uppboðsins í kvöld segist Tryggvi ekki búast við því og bætir við: „Það verður tekið vel á móti þeim."

Uppboðið í kvöld er nokkuð veglegt en þar má finna listaverk eftir Kjarval, Louisu Matthíasdóttur, Ásgrím Jónsson, Þorvald Skúlason, Finn Jónsson og Þórarin B. Þorláksson. Þá verður einnig boðið upp á listaverk eftir núlifandi listamenn eins og Kristján Davíðsson og fleiri.