Snákar úr Hafnarfirði með smitandi salmonellu

Fimm snákar, skordýr og Tarantula kóngulær sem lögreglan gerði upptæka í heimahúsi í Hafnarfirði 1. júlí síðastliðinn, reyndust vera smitaðir af Salmonella cholerasuis. Þetta kom fram á vef Matvælastofnunnar en kvikindin voru krufin á Keldum og sýkladeild LSH.

Matvælastofnun áréttar að það er góð og gild ástæða fyrir innflutningsbanni á skriðdýrum. Ástæðan er helst sú að salmonellan getur bæði smitað menn og dýr.

Bannið byggði upphaflega á alvarlegum sjúkdómstilfellum í fólki af völdum salmonellasmits sem rekja mátti með ótvíræðum hætti til innflutnings skriðdýra á borð við slöngur, skjaldbökur og eðlur.

Árið 1983 kom upp sýking af völdum Salmonella paratyphi B (sem veldur taugaveikibróður) á heimili í Reykjavík sem grunur lék á að væri af völdum smits frá vatnaskjaldböku.

Sú grunsemd reyndist á rökum reist og ræktaðist bakterían bæði úr vatni, fiskabúri og úr skjaldböku heimilisins. Við nánari rannsókn í gæludýraverslunum á höfuðborgarsvæðinu kom í ljós mikil mengun með Salmonella paratyphi B í fiskabúrum verslananna og í skjaldbökum sem þær höfðu til sölu.

Þess skal getið að full heimild er fyrir innflutningi á froskum og salamöndrum, enda samsetning þarmaflóru þeirra með öðru sniði.