Segir ekki skynsamlegt að framleiða meira ál á Íslandi

Formaður loftslagsnefndar Sameinuðu þjóðanna, Dr. Rajendra Pachauri, heimsótti Ísland í síðasta mánuði en hann tók við friðarverðlaunum Nóbels fyrir tveimur árum fyrir hönd nefndarinnar. Dr. Pachauri þykir leiðandi í umræðunni um loftslagsvandann en hann flutti meðal annars fyrirlestur í Háskóla Íslands og ræddi við íslenska fjölmiðla.

Ummæli hans um álframleiðslu á Íslandi þóttu nokkuð á skjön við sjónarmið samtaka og einstaklinga sem tala í nafni umhverfisverndar á Íslandi en Dr. Pachauri sagði ekkert því til fyrirstöðu að nota endurnýjanlega orku Íslendinga til að knýja álver og hrósaði Íslendingum fyrir forystu í baráttunni fyrir minni losun gróðurhúsalofttegunda. Þeir ættu miklar endurnýjanlegar orkuauðlindir og skildu mikilvægi þess að nota þær.

Svandís Svavarsdóttir umhverfisráðherra hefur vakið athygli á síðustu vikum fyrir að beita sér ákveðið gegn álverum hérlendis. En er það ekki í andstöðu við sjónarmið formanns loftlagsnefndar Sameinuðu þjóðanna? Hvað segir Svandís um rök hans? Var ekki formaðurinn beinlínis að hvetja til þess að Íslendingar framleiddu meira ál?

Svandís segir að þegar rýnt sé í hvað Dr. Pachauri sagði þá hafi hann sagt að ef það þyrfti endilega að framleiða meira ál þá væri betra að gera það á sem umhverfisvænstan hátt. Svandís segir að menn þyrftu hins vegar að horfa til fleiri sjónarmiða á Íslandi, að atvinnuuppbyggingin yrði ekki þannig að við værum með öll eggin í sömu körfunni. Það væri ekki skynsamlegt fyrir eitt samfélag að byggja framtíðina, að ekki væri talað um sjálfbæra og græna framtíð, á stóriðju og álverum.