Íslendingar nota tonn af kannabis á ári

Á árunum 1995 til 2000 tvöfaldaðist skyndilega fjöldi kannabisfíkla á Vogi. Íslendingar hafa aldrei notað jafn mikið af kannabisefnum og nú. Það líður varla sú vika að kannabisframleiðsla sé ekki stöðvuð og talið er að tugir manns hafi fulla atvinnu af því að framleiða og selja kannabis á Íslandi. Varlegustu áætlanir gera ráð fyrir því að Íslendingar neyti heils tonn af kannabis á ári. Þá má reikna að götuverðið á þeirri neyslu sé nærri þremur og hálfum milljarði. Allt eru það varlega áætlaðar tölur.

Þetta er meðal þess sem kemur fram í grein í nýjasta tölublaði SÁÁ og birt er á heimasíðu samtakanna.

„Varla líður sú vika að kannabis komist ekki í fréttirnar og undarlegt til þess að hugsa að kannabisefni og kannabisneysla skuli hafa verið óþekkt á Íslandi árið 1967 og enginn ólöglegur vímuefnamarkaður var til. Nú um 50 árum seinna er framleiðsla, innflutningur, dreifing, verslun og neysla þessara efna hluti af hinu daglega lífi Íslendinga."

Í greininni sem er nokkuð ítarleg segir að eitt gramm af kannabis (hassi og maríjúana) kosti 3.500 krónur og fari hækkandi. Einnig segir að 75% kannabisfíkla sem koma á Vog séu einnig örvandi vímuefnafíklar. Kannanir benda til að næstum þriðjungur kannabisfíkla á Vogi hafi sprautað sig í æð. 16,6% var kominn með lifrabólgu C.

Hægt er að sjá greinina í heild sinni hér.