Breytt skattlagning lífeyris ofmetin leið

Steingrímur J. Sigfússon fjármálaráðherra hafnar ekki hugmyndum Sjálfstæðisflokksins um kerfisbreytingu á skattlagningu lífeyris en setur fyrirvara á hversu raunhæfar þær eru. Upphæðirnar sem settar eru fram í tillögunum séu háar og „barbabrellulegt að halda því fram“ að þessi leið geti komið í stað allra skattahækkana. Það sé óraunhæft að það sé hægt að ná slíkum bata í afkomu ríkissjóðs með þeim hætti sem boðað er.

Sjálfstæðisflokkurinn hefur lagt fram þingsályktunartillögu um þær bráðaaðgerðir sem flokkurinn telur nauðsynlegar til að bregðast við efnahagsvanda þjóðarinnar. Ein þeirra fjallar um skattlagningu inngreiðslna í lífeyrissjóði í stað útgreiðslna. Með slíkri breytingu telur Sjálfstæðisflokkurinn að megi auka tekjur ríkissjóðs um 35 til 40 milljarða á ári, sem gæti komið í stað þeirrar skattlagningar sem ríkisstjórnin hefur boðað.

Steingrímur segir að helst verði sjálfstæðismönnum hrósað fyrir að leggja hugmyndina fram með þeim hætti að útfærsla hennar sé opin. Í vor hafi sama hugmynd verið kynnt með þeim hætti að bylta þyrfti lífeyriskerfinu og hann hefði varað við því. Þeirri hugmynd hefði verið fálega tekið „svo vægt sé til orða tekið“, segir Steingrímur.

„Þeir leggja einnig til að skoða séreignarsparnaðinn sérstaklega og það finnst mér sjálfsagt að gera. Það væri því háð að um það væri sæmilegur friður og skynsemi væri í slíkri útfærslu,“ segir Steingrímur.

Umrædd leið felst í að fresta skattlagningu séreignarsparnaðar sem myndi skila 115 milljarða eingreiðslu í ríkissjóð strax á næsta ári og þrettán milljörðum árlega eftir það.

En kemur til greina að halda inni boðuðum niðurskurði og skattahækkunum og fóstra hugmynd sjálfstæðismanna um breytta skattlagningu séreignarsparnaðarins? Væri þá ekki búið að loka með einu pennastriki títtnefndu fjárlagagati sem á að loka á þremur árum og verður sársaukafullt fyrir alla landsmenn?

„Þegar rýnt er betur í þetta þá held ég að þetta sé ekki svona einfalt. Þá værum við bara að taka risastórt lán í framtíðinni. Það verður líka að hafa í huga að féð er bundið. Vörsluaðilar séreignarsparnaðar reiða ekki fram 115 milljarða króna rétt si svona.“

svavar@frettabladid.is