Garðar ekki með gegn Makedóníu

Garðar Jóhannsson náði ekki að hrista af sér þau meiðsli sem hafa verið að angra hann og verður hann því ekki með íslenska landsliðinu gegn Makedóníu ytra á morgun.

Leikurinn er liður í undankeppni HM 2010 en Ísland tapaði fyrir Hollandi, 2-1, um helgina. Garðar var valinn í hópinn fyrir þessi tvö verkefni en ákveðið var að hvíla hann nú um helgina í þeirri von að hann myndi ná sér fyrir morgundaginn.

„Það er núna alveg ljóst að hann getur ekki spilað með okkur," sagði Ólafur Jóhannesson, landsliðsþjálfari, í samtali við Vísi í dag.

Þeir Stefán Gíslason og Emil Hallfreðsson hafa einnig átt við meiðsli að stríða en verða klárir fyrir morgundaginn.

„Emil komst í gegnum æfinguna í dag vandræðalaust og Stefán komst í gegnum ákveðna hlaupaáætlun sem lögð var fyrir hann. Hann verður því orðinn klár á morgun."

Leikurinn hefst klukkan 15.45 á morgun og verður lýst beint á Boltavakt Vísis og Fréttablaðsins.