Borgarráð samþykkir 5 milljarða lífeyrissjóðslán

Borgarráð samþykkti á fundi sínum í dag tillögu Hönnu Birnu Kristjánsdóttur borgarstjóra um 5 milljarða króna lántöku til að fjármagna framkvæmdir á vegum Reykjavíkurborgar á árinu 2009. Lánið er tekið með skuldabréfaútboði til 45 ára en nú þegar liggja fyrir skuldbindandi fyrirheit frá lífeyrissjóðum um kaup á 5 milljörðum.

Í tilkynningu frá borgarráði kemur fram að framkvæmda- og eignaráð hefur í tengslum við lántökuna forgangsraðað framkvæmdum á árinu 2009 en áætlað er að með þeim verði hægt að tryggja allt að 650 störf í Reykjavík. Fyrir utan þessar nýframkvæmdir sem hafa nú verið fjármagnaðar leggur Reykjavíkurborg um 3,5 milljarða króna í viðhald gatna, opinna svæða og fasteigna en áætlað er að þær viðhaldsframkvæmdir skapi til viðbótar allt að 350 aðkeypt störf á árinu, fyrir utan störf borgarstarfsmanna.