Vill ekki lofa gjaldfrjálsum máltíðum í grunnskólum

Birkir Jón Jónsson þingmaður Framsóknarflokksins spurði Katrínu Jakobsdóttur menntamálaráðherra hvort til stæði að bjóða upp á gjaldfrjálsar skólamáltíðir í grunnskólum landsins á Alþingi fyrir stundu. Hann sagðist telja mikilvægt að hlúa að þessum hópi nú þegar margar fjölskyldur standa illa fjárhagslega. Hann minnti Katrínu á að þetta hefði verið eitt af kosningaloforðum Vinstri grænna og spurði hvort til stæði að ríkið kæmi að þessu máli.

Katrín sagðist sammála Birki um að þetta væri brýnt velferðarmál sem mikilvægt væri að horfa til á þessum tímum. Hún sagðist hafa skoðað málið í haust og lét þá reikna út fyrir sig hver hugsanlegur kostnaður ríkisins yrði af þessu. Bráðabirgðartölur og mjög gróflegir útreikningar sýndu að kostnaðurinn væri um 1,8 milljarðar króna fyrir ríkið.

Katrín sagði að nú værum við í erfiðum fjárlögum og hún vildi ekki lofa neinu í ræðustól Alþingis. Hún sagðist hinsvegar telja æskilegt að skoða þessi mál nánar og fara betur í saumana á því hvort einhverjir möguleikar væru þá í sparnaði í skólakerfinu á móti.