Vill láta kanna hvað hvert stöðugildi við byggingu TRH kostar

Það væri áhugavert að kanna hvað hvert stöðugildi við byggingu Tónlistar- og ráðstefnuhússins í Reykjavík kostar, segir Birgitta Jónsdóttir, þingmaður Borgarahreyfingarinnar. „Ég er nú enginn talnaspekingur en mér rennur í grun að það væri töluvert ódýrara að ráða fólk í vinnu við að laga það sem þegar hefur verið byggt og er að grotna niður - sér í lagi út á landi, en að halda áfram að byggja tónlistarhúsið," segir Birgitta um málið á bloggsíðu sinni.

Í samtali við fréttastofu segist Birgitta vilja kanna kostnað við störf víðar í atvinnulífinu. „Það var einhver að segja að eitt gígawatt af orku sé 14 stöðugildi í ylrækt og 0,14 í álveri. Þannig að það væri áhugavert að taka nokkur svona stöðugildi út frá þessum tímum sem við lifum á. Því að við viljum náttúrlega koma fleira fólki en færra í vinnu," segir Birgitta.

Birgitta segist telja að ódýrast sé að halda við húsnæði en dýrast að fara í gatnaviðgerðir. Það verði því að kanna hvað sé hagstæðast fyrir þjóðina. Hún telur því brýnt að fá aðstoð frá starfsfólki Alþingis og ráðuneytanna við að finna út hver þessi kostnaður er.