Lögvarðir hagsmunir voru ekki virtir

Svandís Svavarsdóttir umhverfisráðherra braut stjórnsýslulög þegar hún gaf forsvarsmönnum Norðuráls ekki kost á því að gæta hagsmuna félagsins þegar hún felldi úrskurð vegna Suðvesturlínu, að því er segir í bréfi Norðuráls til ráðherra.

Í bréfinu er Svandís hvött til að afturkalla úrskurð sinn, og meðal annars vísað í að umhverfisráðuneytið hefði átt að leyfa forsvarsmönnum Norðuráls að andmæla um leið og kærur Landverndar og Náttúruverndarsamtaka Íslands hafi borist ráðuneytinu, enda hagsmunir félagsins gríðarlegir.

„Tafirnar sem úrskurðurinn frá 29. september kann að valda hafa víðtækar og neikvæðar afleiðingar fyrir fjölda aðila," segir í bréfi Norðuráls, sem ritað er af lögmanni hjá Logos lögmönnum.

Í bréfinu er einnig tíundað að kærur umhverfisverndarsamtakanna hafi borist eftir að kærufrestur hafi runnið út, og að ráðherra hafi farið þrjá mánuði fram yfir frest sem hún hafði til að úrskurða um málið.- bj