Læknar Jacksons kærðir

Bandarískir og breskir fjölmiðlar héldu því fram í gær að tveir af einkalæknum Michaels Jackson yrðu færðir í gæsluvarðhald og hugsanlega kærðir fyrir aðild að dauða poppgoðsins.

Bandaríska fréttastöðin Fox News hélt því fram í gær Dr. Conrad Murray og Dr. Arnold Klein, einkalæknar Michaels Jackson, yrðu handteknir eftir tvær vikur og að þá yrðu þeir kærðir fyrir manndráp af gáleysi. Lögreglan í Los Angeles verst allra frétta en samkvæmt Fox News hyggst hún nota næsta hálfa mánuðinn til að safna saman sönnunargögnum sem eiga að nægja til að byggja upp mál gegn Murray og Klein. Þótt krufning Jacksons hafi ekki verið gerð opinber þykir mönnum líklegt að verkjalyfið Propafol, sem er víst í sterkara lagi, hafi dregið Jackson til dauða 25. júní. Læknarnir hafi skrifað upp á lyfið fyrir Jackson og með því sýnt vítavert gáleysi. Eftir því sem Fox News kemst næst ber Klein mun meiri ábyrgð á andláti poppguðsins en Murray enda var hann einkalæknir Michaels. Talið er líklegt að Jackson hafi fengið hjartaáfall á heimili sínu í Kaliforníu af völdum verkjalyfsins.

Í gær var síðan samningsdrögum tryggingafyrirtækisins AEG og Jacksons lekið á netið. Þar kemur í ljós að Jackson hafi verið heill heilsu. Læknar tryggingafélagsins gátu ekki komið auga á neitt í heilsufari hans sem hefði getað komið í veg fyrir að hann gæti sinnt This is it-tónleikaferðinni sem skyldi og rennir sú staðreynd enn frekari stoðum undir grun lögreglunnar í Los Angeles. Læknarnir tveir hefðu ekki átt að skrifa upp á þetta sterka verkjalyf. Sá samningur upplýsir einnig að Jackson hugðist ekki vera með neitt hálfkák á sviði því hann skuldbatt sig til að vera á sviðinu í áttatíu mínútur í það minnsta. Einhverjar sögusagnir höfðu verið á kreiki á netinu um að Jackson myndi einungis bregða fyrir í mýflugumynd.

Ekki er hægt að sleppa því að minnast á fjölskyldu Jacksons sem nú hefur skotist aftur fram á sjónarsviðið því raunveruleikaþáttur er í bígerð um bræður hins fallna poppguðs og endurkomu þeirra í kastljós fjölmiðlanna.