Ungir Sjálfstæðismenn ánægðir með Guðlaug Þór

Samband ungra sjálfstæðismanna fagnar þeim breytingum sem Guðlaugur Þór Þórðarson heilbrigðisráðherra hefur lagt til á sviði heilbrigðismála. Með tillögunum er gerð tilraun til þess að ná fram varanlegum umbótum á rekstri heilbrigðisstofnana á Íslandi í því skyni að auka skilvirkni og hagræði.

Þetta kemur fram í yfirlýsingu frá SUS. Þar segir ennfremur að mikilvæg sé, einkum um þessar mundir, að stjórnvöld leiti leiða til þess að draga úr kostnaði. Heppilegast sé ef slíkur sparnaður geti náðst fram með því að gera breytingar sem fela í sér varnalega hagræðingu í stað þess að framkvæmdum sé frestað eða að flatur niðurskurður komi í stað raunverulegrar forgangsröðunar. Í yfirlýsingunni segir að tillögur heilbrigðisráðherra miði að þessu marki. Hagsmunir sjúklinga og skattgreiðenda séu settir ofar en hagsmunir stofnana.

„Hlutverk stjórnmálamanna er að forgangsraða. Þær ákvarðanir sem heilbrigðisráðherra hefur tekið um hagræðingu heilbrigðiskerfisins eru ekki óumdeildar eða óumdeilanlegar. Ungir sjálfstæðismenn fagna því að ráðamenn þjóðarinnar hafi þor til að taka erfiðar en nauðsynlegar ákvarðanir. Ennfremur skorar stjórn SUS á þingmenn og ráðherra að skjóta sér ekki undan þeirri ábyrgð að taka erfiðar ákvarðanir í því árferði sem nú ríkir."