Meryl hin fullkomna

Bandaríska leikkonan Meryl Streep er lifandi goðsögn í Hollwyood og er á sama stalli í huga bandarískra leikkvenna og Marlon Brando og Robert De Niro hjá körlunum.

Nýjasta kvikmynd Meryl Streep heitir Julia & Julia og verður frumsýnd hér á landi um helgina. Myndin flakkar á milli tímabila og segir annars vegar frá hinu fræga matargúrúi Juliu Child og árunum hennar í Frakklandi í kringum 1960 en þar sökkti hún sér ofan í franska matargerð. Og hins vegar frá Juliu Powell sem ákveður dag einn að elda allar uppskriftirnar hennar Child úr hinni víðfrægu matreiðslubók Mastering the Art of French Cooking á einu ári en þær eru 524. Auk Streep fara þau Stanley Tucci og Amy Adams með stór hlutverk í myndinni en leikstjóri og handritshöfundur er Noah Ephron.

Meryl Streep er algjörlega einstök leikkona í Hollywood. Ferill hennar hófst fyrir alvöru árið 1978 þegar hún lék í hinni mögnuðu kvikmynd Michael Cimino, The Deer Hunter, á móti Robert De Niro og Christopher Walken. Þar hlaut Streep sína fyrstu tilnefningu af fimmtán til Óskarsverðlauna fyrir túlkun sína á Lindu. Fjórum árum seinna var hún komin með styttuna góðu upp í skáp fyrir Sophie‘s Choice. Streep er fædd árið 1949 og ólst upp í smábænum Bernardsville í New Jersey. Streep fékk snemma áhuga á leiklist og útskrifaðist af leiklistarbraut Yale snemma á áttunda áratugnum. Fyrstu hlutverk hennar voru á sviði í New York en hana fór fljótlega að dreyma um hvíta tjaldið. Sagan segir að hún hafi mætt í inntökupróf fyrir King Kong-kvikmynd Dino De Laurentiis en sá hafi vísað henni á bug á þeim forsendum að Streep væri ljót. Dino kom þessari skoðun sinni á framfæri við aðstoðarmann sinn á ítölsku og honum til mikillar undrunar svaraði Streep honum fullum hálsi til baka. Á ítölsku. Og það hefur kannski verið eitt helsta einkennið á nánast flekklausum ferli leikkonunnar. Hún hefur getað brugðið sér í allra kvikinda líki, náð næstum öllum tungumálum fullkomlega. Streep hefur enn fremur átt frekar auðvelt með að halda einkalífi sínu utan kastljóss fjölmiðlanna, en hún hefur verið gift bandaríska höggmyndalistamanninum Don Gummer síðan 1978.

Meryl Streep hefur samkvæmt kvikmyndavefnum imdb.com verið tilnefnd til 82 verðlauna fyrir kvikmyndaleik, þar af 22 til Golden Globe. Ferill hennar í Hollywood er því einstakur og verður eflaust seint eða aldrei leikinn eftir. Og ef til vill lýsti Jack Nicholson henni best þegar AFI, bandaríska kvikmyndastofnunin, heiðraði hana fyrir nokkru. „Þú ert einfaldlega fullkomin.“- fgg