Sunnudagsútgáfu Fréttablaðsins hætt

Ákveðið hefur verið að fækka útgáfudögum Fréttablaðsins og hættir blaðið að koma út á sunnudögum frá og með næstu helgi. Þess í stað verður helgarútgáfa blaðsins efld til muna, að sögn Jóns Kaldals ritstjóra Fréttablaðsins. Engar uppsagnir eru fyrirhugaðar vegna breytinganna.

,,Við ætlum gefa út eitt öflugt helgarblað," segir Jón og bætir við að hagræðingin snúi fyrst og fremst að dreifingu og einhverju leyti að prentun blaðsins.

Útgáfa sjö daga vikunnar hentar ekki

,,Fréttablaðið hefur alltaf sveiflast með markaðnum og markaðurinn er þannig núna að hann stendur illa undir útgáfu sjö daga vikunnar." Jón segir að ákvörðunin sé tímabundin varnaraðgerð sem verði endurskoði breytist horfur á markaði.

Sunnudagsútgáfu Fréttablaðsins hafa fylgt fjögur sérblöð sem munu framvegis koma út á laugardögum. ,,Sérblöð um fjölskyldu, menningu, mat og ferðalög færast í laugardagsútgáfuna."

Engar uppsagnir samhliða breytingum

,,Þessi breyting út af fyrir sig kallar ekki á neina breytingar á ritstjórn blaðsins," segir Jón aðspurður hvort uppsagnir fylgi breytingunni. Aftur á móti segir Jón að Fréttablaðið þurfi líkt og önnur fyrirtæki í landinu að endurmeta stöðuna stöðugt.

Engar róttækar breytingar á útliti og uppsetningu

,,Engar róttækar breytingar verða á laugardagsútgáfunni enda blaðið ákaflega vel lesið," segir Jón en bætir við að smávægilegar breytingar verði gerðar á útgáfunni sem dyggir lesendur munu væntanlega taka eftir.