Öngþveiti í Gilinu á Aukureyri

Umferðaröngþveiti varð í Gilinu á Akureyri í morgun þegar snjómokstur olli eignatjóni og ýmisskonar vanda. Verkstjóri hjá bænum telur að loka hefði átt Gilinu á meðan snjómoksturinn fór fram.

Snjó hefur kyngt niður á Akureyri síðustu sólahringa. Um níuleytið í morgun skapaðist slysahætta þegar vinnuvélar voru að störfum við snjómokstur í Kaupangsstræti, eða Gilinu, eins og þessi bratta gata er jafnan nefnd í daglegu tali heimamanna. Snjóruðningarnir voru erfiðir yfirferðar og fór svo að ýmis ökutæki, smá og stór, þar á meðal strætisvagnar, komust ekki leiðar sinnar, runnu til og nudduðust saman. Hér varð tjón á bæði strætónum og jeppanum í árekstri. Og sumir urðu að aka ansi frjálslega til að koma í veg fyrir slys. Gangstéttin orðin að aksturssvæði.

Vegfarendur, sem fréttastofa ræddi við í morgun, sögðu að þegar aðstæður væri jafnvarasamar og í morgun ætti að loka Gilinu meðan mokstur fer fram. Fréttastofa bar þetta undir Gunnþór Hákonarson verkstjóra hjá framkvæmdadeild bæjarins og viðurkenndi hann að best hefði verið að loka gilinu áður en snjómoksturinn fór fram í morgun. Hans skoðun væri reyndar sú að loka ætti Gilinu miklu oftar en gert er til að auka umferðaröryggi á meðan mokstri stendur.

Akureyrarbær hefur nýverið tekið upp á því að nota salt til hálkuvarna í stað sandsins en sandurinn víkur til að minnka svifryk. Allnokkur gagnrýni hefur komið fram á saltnotkunina en bærinn aftekur það með öllu að saltið hafi verið sökudólgurinn í morgun.