Brottvísun flóttamanna ekki geðþóttaákvörðun ráðherra

Ragna Árnadóttir, dómsmála- og mannréttindaráðherra, segir að ákvörðun um brottvísun hælisleitenda væri byggð á lögum og almennum mælikvörðum. Ekki væri um að ræða geðþóttaákvörðun ráðherra.

Anna Pála Sverrisdóttir, þingmaður Samfylkingarinnar, spurði Rögnu út í fyrirhugaðan brottflutning flóttamanna frá Íslandi. Brottvísun þeirra var mótmælt í gærkvöldi, meðal annars við heimili Rögnu.

Ragna sagði mál allra flóttamanna vera skoðað gaumgæfilega. Ennfremur benti hún á að flóttamannahjálp Sameinuðu þjóðanna hefði komist að þeirri niðurstöðu að aðstæður í Grikklandi hefðu breyst til hins betra. Óhætt væri fyrir flóttamennina að snúa aftur til Grikklands.