Ísland svarar til um Helguvík

Fjármálaráðuneytið hefur svarað viðbótarspurningum ESA, Eftirlitsstofnun EFTA, um fjárfestingarsamning ríkisins við Century Aluminium, vegna álvers í Helguvík. Frestur til svars rann út á þriðjudag, en ráðuneytið svaraði 26. maí.

ESA hefur nú tvo mánuði til að ljúka yfirferð sinni.

Samningurinn var ræddur á Alþingi í apríl og gagnrýndur vegna ríkisaðstoðarinnar sem í honum felst. Þá heyrðust efasemdir um að hann stæðist EES-samninginn. ESA skoðar það.

ESA fór einnig á sínum tíma yfir samninga vegna álvers á Reyðarfirði og stækkun álvers í Straumsvík. Ingvi Már Pálsson í fjármálaráðuneytinu segir að minna sé í nýja samninginn lagt af hálfu ríkisins, ef eitthvað er.

„Hann er ekki jafn viðamikill og það eru ekki jafn mörg frávik frá íslenskum skattareglum,“ segir hann. Á móti komi betri trygging gegn skattahækkunum, en áður var.

Century er til dæmis heitið því að tekjuskattur fyrirtækisins fari aldrei yfir fimmtán prósent, en hlutfallið var átján prósent vegna álvers í Reyðarfirði. - kóþ