Sjálfsvígum ekki fjölgað hér á landi

Undanfarin ár hafa sjálfsvíg verið um 30 talsins. Árið 2005 voru þau 24 talsins, 32 árið 2006, 37 árið 2007 og 28 árið 2008. Á síðustu 4 mánuðum eru aðeins skráð 5 tilvik, sem er talsvert minna en á sama tímabili á undanförnum árum. Samkvæmt óstaðfestum tölum frá slysadeild Landspítala ber ekki heldur á fjölgun sjáfsvígstilrauna síðustu mánuðina.

Þetta kemur fram í máli Matthíasar Halldórssonar landlæknis á heimasíðu Landlæknisembættisins. Þá segir að rétt þyki að koma þessu á framfæri vegna orðróms um hið gagnstæða.

„Einnig má nefna að innlögnum á geðdeild Landspítala hefur heldur fækkað og engin sjáanleg aukning er á notkun geðlyfja samkvæmt skráningu í lyfjagagnagrunni Landlæknisembættisins."