Fangaverðir vilja nýtt fangelsi

Stjórn Fangavarðafélags Íslands skorar á stjórnvöld að standa við áætlanir um byggingu nýs fangelsis á höfuðborgarsvæðinu og uppbyggingu fangelsisins að Litla-Hrauni. Þetta kemur fram í ályktun félagsins sem var samþykkt á stjórn þess í síðustu viku.

Þar segir ennfremur:

„Fangelsi landsins hafa verið yfirfull lengi og biðlistar eftir afplánun lengjast í hlutfalli við fjölgun fangelsisdóma. Stefna fangelsisyfirvalda byggir á hugmyndum um fangelsun sem betrun og hefur starf fangavarða færst í átt að þessum hugmyndum síðustu ár og áratugi. Á sama tíma eru tvö af fimm fangelsum á Íslandi nú úrelt samkvæmt evrópskum reglugerðum, annað bíður niðurrifs og hitt er rekið á síendurnýjaðri undanþágu frá íslenskum heilbrigðisyfirvöldum."

Að lokum segir stjórnin að frestun stjórnvalda á framkvæmdunum bitni fyrst og fremst á föngunum en einnig því hæfa fólki sem myndar stétt fangavarða.

„Á meðan húsakostur og aðbúnaður helst óbreyttur er störfum þeirra hins vegar mjög þröngur stakkur skorinn og þekking þeirra og hæfni illa nýttar," segir svo í ályktun stjórnarinnar.

Í ályktuninni segir að aðbúnaður í Hegningarhúsinu við Skólavörðustíg 9 sé barns síns tíma og endurspegli úrelt gildi.