Jóhanna Guðrún komst áfram í úrslit Eurovision

Jóhanna Guðrún Jónsdóttir komst áfram upp úr fyrri undanúrslitariðlinum í Eurovision fyrir stundu og tekur því þátt í úrslitakvöldinu sem fer fram á laugardaginn í Moskvu.

Óhætt er að segja að flutningur Jóhönnu á laginu, Is it True, hafi verið stórkostlegur en atriði Íslands var það tólfta í röðinni á sviðinu í Moskvu í kvöld.

Alls komust 10 lög áfram í kvöld. 9 lög komust áfram í símakosningu en dómnefnd valdil eitt lag áfram. Eftirfarandi lönd komust áfram:

Tyrkland, Svíþjóð, Ísrael, Portúgal, Malta, Finnland, Bosnía-Hersegóvenía, Rúmenía, Armenía Ísland.

Því er ljóst að Eurovision stemmningin verður allsráðandi í úrslitunum á laugardaginn þar sem Jóhanna mun spreyta sig meðal þeirra bestu.

Ísland var síðasta lagið inn í úrslitin og heyrðist hrópað „Iceland, Iceland, Iceland" í salnum rétt áður en nafn okkar var lesið upp.

Vísir óskar Jóhönnu og hinum í hópnum tilhamingju með stórkostlega frammistöðu í kvöld.