Gullstyttuáform í salt vegna kreppu

Sérvitringurinn Nick Cave hefur frestað áformum um að reisa gullstyttu af sjálfum sér í heimabæ sínum, Warracknabeal í Ástralíu.

„Ég ætlaði að koma styttunni fyrir miðsvæðis í þessum agnarsmáa bæ þar sem ég fæddist,“ sagði hann í viðtali við tímaritið Time. „En því miður er ástandið í Warracknabeal svo slæmt þessa stundina. Það væri hrikalega smekklaust að reisa þar risavaxna gullstyttu á meðan kreppan og þessi leiðindi ganga yfir. En dag einn geri ég þetta.“

Cave hefur þegar látið útbúa frumgerð af styttunni, sem er ansi sérstök. „Ég er nakinn á hesti sem er að prjóna,“ sagði hann. „Ég er klæddur í litla lendaskýlu. Þetta er stórkostleg hómóerotísk list.“ - afb