Ísland háð AGS hálfu ári lengur en til stóð

Stjórn Alþjóðagjaldeyrissjóðsins (AGS) samþykkti á fundi sínum síðdegis í gær aðra endurskoðun efnahagsáætlunar Íslands, sem tafist hefur um átta mánuði. Íslensk stjórnvöld mega því eiga von á næstu lánafyrirgreiðslu AGS á næstunni.

Tafirnar hafa það í för með sér að afgangi áætlunarinnar verður í raun hliðrað um nokkra mánuði, og samstarfið framlengt frá nóvember 2010 fram í maí 2011.

Lánið frá AGS er 167,5 milljónir Bandaríkjadala, eða um 21 milljarður íslenskra króna. Þá er einnig að vænta viðbótarlána frá Norðurlöndunum sem voru háð endurskoðuninni, upp á 625 milljónir dala, eða um 78 milljarða króna. Heildarlánið sem Ísland fær á næstunni er því rétt tæplega 100 milljarðar.

Til þessa hefur það helst verið Icesave-málið sem staðið hefur í vegi fyrir því að endurskoðunin yrði samþykkt. Breytingar á Icesave-lögunum hafa hins vegar enn ekki verið samþykktar á Alþingi og málinu því enn ólokið. Að sögn Gylfa Magnússonar efnahags- og viðskiptaráðherra hefur stjórn AGS nú fulla trú á að frumvarpið verði samþykkt og tók ákvörðun sína í trausti orða íslenskra stjórnvalda þar um.

Til að endurskoðunin gengi í gegn þurftu stjórnvöld að fá undanþágu frá nokkrum atriðum sem kveðið er á um í samningnum við AGS. Kröfur sem settar voru um lánsfjárjöfnuð ríkissjóðs við lok desember 2008 stóðust ekki vegna þess að hrunið reyndist kostnaðarsamara en við var búist og gjaldeyrisforði á sama tíma var undir viðmiðunarmörkum AGS.

Einnig þurfti undanþágu vegna þess að herða þurfti á gjaldeyrishöftum fyrir skemmstu til að koma í veg fyrir leka og vegna þess að endurfjármögnun bankanna er enn ólokið, en henni á að ljúka í nóvember.

Stjórnvöld vonast til þess að áfanginn auki traust alþjóðlegra fjármálamarkaða á Íslandi, dragi úr vaxtakostnaði, auðveldi Seðlabanka Íslands að lækka stýrivexti og afnema gjaldeyrishöft. Gylfi segir að fyrsti áfangi í afnámi haftanna, það er að opna fyrir innstreymi erlends fjármagns, taki gildi nú fyrir helgi.

Næsta endurskoðun er áætluð í desember. Þá berast einnig næstu lán frá Norðurlöndunum og Póllandi.stigur@frettabladid.is