Pavlyuchenko líklega á förum frá Tottenham í janúar

Fátt virðist nú geta komið í veg fyrir að framherjinn Roman Pavlyuchenko yfirgefi herbúðir Tottenham þegar félagaskiptaglugginn opnar í janúar.

Pavlyuchenko hefur fengið lítið að spreyta sig á yfirstandandi keppnistímabili og er fallinn enn aftar í goggunarröðinni en á síðasta tímabili. Pavlyuchenko fékk reyndar tækifæri í byrjunarliði Tottenham á þriðjudag í deildarbikarleik gegn Everton en þótti ekki standa sig vel og hefur umboðsmaður hans komið með skýringar á því af hverju það var.

„Auðvitað er það ekki gott fyrir hvaða leikmann sem er að sitja alltaf á bekknum. Ég tel samt að ástæða þess að hann hefur ekki verið að spila vel sé miklu frekar sálfræðileg heldur en spurning um leikform. Roman finnur fyrir því að knattspyrnustjórinn treystir honum ekki og kýs frekar að nota aðra framherja liðsins þegar hann hefur kost á því.

Þetta ástand verður að leysast því þetta hefur áhrif á stöðu hans innan rússneska landsliðsins einnig," segir umboðsmaðurinn Oleg Artemov í viðtali við The Sun.

Ef af sölu verður í janúar er líklegt að Tottenham reyni að fá eins mikið af þeim 14 milljónum punda sem félagið greiddi fyrir leikmanninn fyrir rúmu ári síðan. Zenit frá Pétursborg og AC Milan hafa bæði verið orðuð við rússlenska landsliðsmanninn undanfarið.