Aukning á kynlífsathöfnum fyrir tóbak og áfengi

Aukning hefur orðið á því að unglingsstúlkur gangist inn á kynlífsathafnir í skiptum fyrir tóbak og áfengi, ef marka má fjölgun á kærum til lögreglunnar á höfuðborgarsvæðinu. Dæmi eru um að brotin hafi átt sér stað á salernum verslunarmiðstöðva og skóla og jafnvel leitt til nauðgunar.

Starfsfólk barnaverndaryfirvalda og lögreglu hefur um árabil þurft að vinna að lausn mála er varða unglingsstúlkur sem eiga kynmök gegn því að þær fái áfengi, tóbak, fíkniefni, aðgang að partýjum eða bara kvöldstund í glæsibifreiðum í staðinn. Í þessum málaflokki hafa fimm kærur borist lögreglunni á höfuðborgarsvæðinu það sem af er árinu, þar af ein nauðgunarkæra. Fjölgun er sögð hafa orðið á slíkum málum.

„Já, vissulega hef ég séð það og færist nokkuð niður í aldri. Hins vegar held ég að það sé aðeins brot af því sem við sjáum hér," segir Ólöf Ásta Farestveit, forstöðumaður Barnahúss.

Kynferðislegur lögaldur var hækkaður úr 14 ára og í 15 ára árið 2007, sem þýðir að fyrir þann aldur er ástundun kynlífs bönnuð. Hins vegar eru dæmi um að þolendur í slíkum málum - stúlkur og jafnvel drengir - séu 13 ára og ófermdir. Brotin eiga sér stað á ýmsum stöðum - til að mynda í bifreiðum, heimahúsum, skólum og verslunarmiðstöðvum. Net-og klámvæðingin er sem fyrr talin ýta undir þessi mál, sem eru sögð erfið enda upplifa þolendur sig sem þátttakendur og vilja lítið tjá sig.

„Þessar stúlkur þá sérstaklega, eru of ungar til að geta sett mörk. Þær eru of ungar til að skynja ekki alveg - átta sig ekki á muninum á réttu og röngu. Eiga erfitt með að setja persónuleg mörk fyrir sjálfa sig og þennan ákveðna ramma," segir Ólöf Ásta.

Gerendur sem eru eldri en 15 ára eru sakhæfir og geta mál leitt til harðrar refsingar. Og þrátt fyrir fræðslu virðast forvarnir ekki nægar.

„Ég held að við þurfum að byrja miklu miklu fyrr. Við þurfum að byrja strax á unga aldri að byggja upp sjálfsvirðingu barnanna. Hjálpa þeim að tala um líkama sinn, skilja líkama sinn og hvað má og hvað ekki til að setja þessi persónulegu mörk," segir Ólöf að lokum.