Spurt og svarað um aðgerðir vegna skuldavanda heimila

Á upplýsingavefnum Island.is er nú hægt að lesa spurningar og svör þar sem er útskýrt hvað felst í boðuðum aðgerðum stjórnvalda gegn skuldavanda heimilanna sem áætlað er að taki gildi 1. nóvember næstkomandi.

Í tilkynningu segir að aðgerðir stjórnvalda felast í almennum aðgerðum sem hafa að markmiði að lækka greiðslubyrði einstaklinga vegna verðtryggðra og gengistryggðra húsnæðislána og gengistryggðra bílalána. Þetta verður gert með greiðslujöfnun lána þar sem sett verður þriggja ára hámark (þak) á mögulega lengingu lánanna vegna greiðslujöfnunar.

Reynt er að útskýra á aðgengilegan hátt hvað felst í greiðslujöfnun þessara lána, hvaða áhrif þakið hefur, hve mikið megi reikna með að greiðslubyrðin lækki og margt fleira.

Stjórnvöld boða einnig sértækar aðgerðir til að mæta vanda einstaklinga sem eiga í það miklum greiðsluvanda að almennar aðgerðir nægja ekki. Þessi úrræði eru útskýrð í stuttu máli en á næstunni verða einnig settar fram spurningar með svörum til að gera ítarlega grein fyrir hvað í þeim felst.

Samantekt spurninga og svara á Island.is er unninn í samvinnu félags- og tryggingamálaráðuneytisins og fjölmargra fjármálafyrirtækja og lánastofnana sem koma að þessum úrræðum og framkvæmd þeirra.